2011-08-26 12:03:22

Ko kolli junngo wadhitinoo

Allaahu tagi kolli
Sabu o tagay ko o faalaa

O jodhdhinidhi  neenegootooji e newre wootetere
Sabu o wadhay ko o faalaa.

O holli yodhi wonndu hinaa yodhi seedu,
O holli yodhi faamondir wonaa yodhi lurru.

O tagi ngordu e sappordu e ciwatun e dhiya.

Hondu goo no sembi kono juuta,
Hondu goo no juuti kono semba.

On faamiidhun kolli junngo?
Awa yaka seede mon yo caldhi junngo.

Kono ngorndu hucci dhiya,  wi´i: sembeendi an gaynay,
gaynanaylan min, min.
Banni midho mari doole.

Nduyakadi  hucci dhiya wi, i : juuteendi an gaynay,
gaynanaylan min, min, Mi hewtay ka mi faalaa.

Hunndhu goo kadi nyembi hucci, jali jaabii:
Mi sembaa mi juutaa kono hino nhgari:
Moose yimbhe fow ko fii nghari, ko fii an.

On faamii dhun caldhi Fuuta e iwdi Fuuta?
On faamiidhun sukaabhe Fuuta, nee iwdi Fuuta?
On faamiidhun Mawbhe Fuuta,  nee iwdi Fuuta?

Ko onon yo Fugumbaa, Timbo e Poore Daaka,
Ko onon yo Dinguiraawwii, Gaawal e Maali,
Ko onon yo Telimele,  Mamu e Labe,
Ko onon  yo Dalabaa,  Pita e Tugee e bheya,
Ko onon  yo  Fulbhe Basse-Guinee
Wa nonon Haute-Guinee e Fooree
Ko onon Yo Fulbhe Fuuta dheya leydhe,

Ko enen fow yo Bah e Barry,
Jallo, Souare e Sow.
Ko enen fow yo Tall, Sall, Sumaare e Njaye,
Ko enen fow yo Tunkara e Kante e Dumbuya
Onon men yo Sidibe e Jakite e Tamura
Ko enen fow nootiibhe PULLO GINE!

Ko hondhun huccannde nafi? Hidhen piyeede gooto gooto.
Ko hondhun saakitaare nafi? Aybhe no renndini en ka radheede.
Ko hondhun townitaare nafi? Aybhe no joltini en hersini en.

Seytaane jali weltii jaabii ko min naftorta
Fannii on jokkii huccannde e saakitaare e townitaare.
Ko dhun wadhi si kenii Seytaane aroyi tawi saakitiibhe,
Kenii Seytaane ferii,
Ferii tunte turaydhe, helaydhe muncaydhe
Saakitiibhe.

Nde Saakitiibhe fewtunoo e Allahu lanndii,
Allaahu on annditini ko hollunoo:

„Mi joddhinaali on e newre wootere?
Hanno wonon gooto ka newre wootere?
Nduu honndu ngordu, nduu jooma cembe e doole,
Hindu waawi jogaade kayru tun karambol maa teenirde? Miijitee!

Si on tamondirii ka hoore newre, tunte dhen on waaway bugitaade Seytaane
Radhoo Seytaane, feewon darnde hulommi min, mintun,
Min okkudho on hakkil e doole.
Wata on saakitor wa tobbhoy tobbhoy ndiyan!
Ndaaree doole oo bahru! Wontee bahru yo onon tobbhe tobbhe!

Ontuma bhe hersi sabu Allaahu  okkiibhe fow.

Ontuma bhe faami ko si  bhe fotii tun bhe fow bhe mari doole.

Ontuma bhe faami ko si bhe fottii tun bhe fow bhe dadha jaleede

Ontuma bhe felliti ko si  bhe fottii tun bhe fow bhe danya nghari.

Ontuma bhe felliti ko si bhe fottii tun bhe fow
bhe woopa kaanaru  e kaanineede e oggineende e  dooleede e  hersineede e  muleede.

Huuhindiren non yo mussibbhe,
Nootondiren non yo enen caldhi Fuuta,
Tamondiren non yo julbhe Fulbhe
Ka  fii  dadhugol ka fii peewal.
Wata en dhabbhitu wata en accan dhabbhitoobhe.
Yottodhen haa Seytaane acca!
Tamondiren wadhee tobbhe bahru,
Ontuma tun en foolay, ontuma tun en gaynay,
Ontuma tun en rindhay, en jalbay, en hisay.

Kaa Musigel?

Min  mi waawataa mintun.
Nghari an e doole an e jawdi an e cuucal an
gaynataa si ko min tun.

An le Mussidho?

Wakkilaare ko kaafa Allah.

Hidhen wakkilii, kono wakkiloden

Ontuma, Ontuma tun

Allahu wallay, wallay en en fow.
Aamiin!

Allaahumma salli alaa sayyidinaa Muhammadin wa sallim.
   
A. Diallo

Revenir en haut de la page